DIL PLASCHER DA CONSTRUIR.

Sch’ins lavura sco scrinari ni lennari, eis ei evident dad era sefatschentar cun la construcziun da casas. Damai che l’architectura ha gia adina fascinau nus e perquei che nus lessan s’engaschar activamein da formar nies ambient da viver, surprendin nus era fetg bugen la planisaziun e sviluppaziun per da tuttas sorts baghetgs. Aschia vein realisau numerusas renovaziuns e baghetgs novs, casas per famiglias singulas e vellas, casas per habitar e da fatschenta sco era baghetgs publics. Era sche nus essan enconuschents per nossas casas Maissen gioga ei per nus negina rolla sch’ei setracta d’in baghetg modern, classic ni rustical – ni d’ina cumbinaziun da quels baghetgs, adina stattan ils giavischs dalla clientella el center. Adina encurin ed anflein, sviluppein e refusein cul plascher e culla passiun che distingua buns architects.